ग्रामीण भेगका महिला शिशुको स्वास्थ्य प्रति सचेत बन्दै

स्वास्थ्य

Home
स्वास्थ्य
ग्रामीण भेगका महिला शिशुको स्वास्थ्य प्रति सचेत बन्दै

ग्रामीण भेगका महिला शिशुको स्वास्थ्य प्रति सचेत बन्दै

आइतवार, पुष १२, २०७७ जागरण समाचार

डडेल्धुरा।
डडेल्धुराका ग्रामीण भेगका महिला अहिले आफ्नो र शिशुको स्वास्थ्य प्रति सचेत हुँदै गएका छन्। नवदुर्गा–४ की डम्बरी कैनी अहिले आफ्नो स्वास्थ्य र शिशुको स्वास्थ्य प्रति सचेत बनेकी छिन्। सामान्यतया खाना खुवाए पछि घरको चुलोचौका सम्हाल्ने उनी अहिले बच्चालाई पोषणयुक्त खानेकुरा खुवाउनु पर्ने जानकारी पाए पछि सचेत बनेकी हुन। “बहुक्षेत्रीय पोषण कार्यक्रमले सचेतना दिए पछि आफूहरु सधैँ स्वास्थ्य प्रति सचेत छौँ”, उनले अगाडि भनीन, “अचेल घरको कामभन्दा आफ्ना दुधे बालकको स्वास्थ्यमा बढी ध्यान दिन्छौँ।”

घर परिवारले पनि गाह्रो काम नगर, शिशुलाई दूध खुवाउनू भन्न थाले पछि उनी निकै खुशी छिन्। “हामीलाई यस्ता कुरा थाहा थिएन, जानेको र सुनेको मात्र गथ्र्यौं”, उनले भनिन्, “अहिले थाहा पाए पछि शिशुको स्वास्थ्य राम्रो हुने भएकाले धेरै समय बच्चालाई दिने गरेको छु।”

पेट भर्नका लागि बालबालिकालाई बिस्कुट र चाउचाउ खुवाउने जिल्ला भरीका आमा अहिले सचेत बनेका छन्। बहुक्षेत्रीय पोषण कार्यक्रमको सहयोगमा कार्यक्रम सञ्चालन भएपछि बालबालिकालाई अत्यावश्यक रुपमा पोषिलो खानेकुरा खुवाउनु पर्ने जानकारी पाएको अमरगढी वडा नम्बर ७ का जानकी ताम्राकारले बताए। “हामी निकै सचेत हुँदै गएका छौँ।, बहुक्षेत्रीय पोषण कार्यक्रमको सहयोगले अहिले घर आँगनमै लगाइएको तरकारी र अन्नका गेडागुडी र पोषिलो खाने कुरा आफू र बच्चालाई खुवाउने गरेको छौँ”, उनले भनिन्।

आमा र बच्चाको पोषण स्थिति सुधार्न सञ्चालित कार्यक्रम अन्तर्गत ‘हरेक बार चार खाना’ को अवधारणा ल्याइएको अमरगढी नगरपालिकाका स्वास्थ्य शाखा प्रमुख गणेश विष्टले बताए। बच्चाको खानामा हरेक बार पहेँलो फलफूल, अन्न, गेडागुडी, हरियो सागपात तथा पशुजन्य खाना खुवाउनु पर्ने कुरालाई कार्यक्रमले सिकाउँदै आएको छ।

अमरगढी नगरपालिका वडा नम्बर १ का यशोदा टमटा भन्छिन्, “बालबालिकाको पोषणका लागि सचेत रहन र व्यवहारमा लागू गर्न सिकाए पछि आफूले बच्चालाई हरेक बार चार तत्व मिश्रित खाना खुवाउने गरेकी छु।” बच्चा दुई वर्षको नहुञ्जेल पोषणयुक्त खानामा जोड दिनु पर्ने र यो अवधिमा बालबालिकामा ८० प्रतिशत शारीरिक, मानसिक र बौद्धिक विकास हुने बताए पछि आमा सचेत बनेका छन्।

अझै पूर्ण रुपमा व्यवहार परिवर्तन हुन नसकेको अमरगढी स्वास्थ्य शाखा प्रमुख विष्टले बताए। “आमाहरु आफ्नो र बालबच्चाको स्वास्थ्य प्रति ख्याल गर्नेसम्मको परिवर्तन भएको छ, अझै धेरै गर्न बाँकी छ उनले भने, “व्यवहार परिवर्तन भन्ने कुरो धेरै कठिन छ। अहिले बच्चालाई स्तनपान र पोषिलो खाने कुरा खुवाउनु पर्छ भन्ने सचेतना आएको छ । ” दिनेश खबरबाट साभार

प्रकाशित मिति: आइतवार, पुष १२, २०७७, ०६:३०:००

प्रतिक्रिया दिनुहोस्